Romina Orozco-Encio gen plis pase 30 an depi lye ak Miami Beach e li se pwopriyetè biznis Abbott Florist ki sitiye sou zile Normandy. Abbott Florist te kòmanse an 1990 lè Romina ak fanmi li te vin Miami Beach soti Ajantin kote papa l te deja gen yon boutik flè. Natirèlman, premye anvi papa l sete louvri youn pa l Ozetazini. Apre yon tan, biznis la te pase bay Romina kote li te kontinye opere l kòm yon biznis familyal.

Menm jan ak nenpòt biznis ki te rete ouvè pou yon bon bout tan, Abbott Florist te andire epi siviv gwo difikilte. Abbott Florist te siviv resesyon apre bul dot com lan, Gwo Resesyon 2008 la, epi tou dènyèman pandemi COVID-19 la. Menm jan ak anpil lòt biznis, Abbott Florist te fèmen pandan 5 mwa pandan pandemi an epi tan an te sanble difisil. Kòm yo pa t kapab jenere okenn lavant, yo te kòmanse gen pwoblèm pou peye lwaye magazen an epi yo pa t kapab achte okenn lòt envantè piske founisè flè yo te fèmen tou atravè lemond.

Men, menm jan ak tout moman difisil nan lavi a, gen opòtinite pou bay an retou. Nan pik pandemi an, Komisyonè Miami Beach, David Richardson, te òganize koleksyon manje pou rezidan Miami Beach ki t ap lite pou rive bout. Nan koleksyon manje sa yo, opòtinite a te vini. Romina t ap pase bò kote koleksyon manje yo epi li te mande kijan li ta ka ede ak efò a. Yo te di l te gen yon founisè flè ki t ap chèche debarase l de envantè yo. Romina te kontakte founisè a epi li te kapab jwenn flè sa yo epi li te itilize yo pou fè dekorasyon pou long liy yo ak moun ki te nan koleksyon manje a. Enpak kominote a te tèlman gwo ke 2 zan apre, moun toujou vini nan magazen Romina a epi remèsye l paske li te dekore liy lan ak flè epi li te ba yo omwen yon ti moman kè kontan pandan moman difisil sa yo. Lè yo bay an retou kominote a, moun toujou al achte nan magazen li, sa ki ede biznis li.

Pandan peryòd rekiperasyon sa a, Romina te kapab jwenn asistans grasa èd Vil Miami Beach ak nan men Prospera. Depatman Devlopman Ekonomik Vil Miami Beach te ofri biznis Miami Beach yo yon sibvansyon Blòk Devlopman Kominotè pou Kowonaviris oubyen CDBG-CV ki te fèt pou ede ti biznis ki te oblije fèmen oubyen ki te afekte akoz pandemi an. Romina te kapab aplike pou sibvansyon sa a epi li te resevwa $20,000 nan fon CDBG-CV ki te itilize pou ratrape lwaye epi pou achte plis envantè kounye a ke biznis li te reprann fonksyonman.

Atravè Miami Beach Business Academy, Romina te resevwa asistans teknik gratis nan men Prospera tou. Prospera se yon òganizasyon san bi likratif ki konsantre sou bay asistans teknik bay antreprenè ki pa gen anpil sèvis pou yo ka pi byen reyalize objektif biznis yo. Romina te patisipe nan youn nan webinè mansyèl yo sou ranfòsman kapasite, ak sesyon fòmasyon an pèsòn ki te òganize pandan 4 jou pa Prospera ki te konsantre sou anseye antreprenè yo kijan pou yo aplike teknoloji nan biznis yo, fondamantal teknoloji, maketing dijital, ak sekirite sibernetik. Lè li te patisipe nan sesyon fòmasyon yo, Romina te gen opòtinite tou pou l konekte ak lòt biznis, patnè kominotè, bank, epi li te genyen yon òdinatè pòtab pou biznis li.

Gras a asistans patnè kominotè yo tankou Vil Miami Beach ak Prospera ansanm ak kouraj antreprenarya Romina, Abbott Florist rete ouvè pou kominote Miami Beach la, pou bay lajwa ak flè pou lavni.